Fékk bjartsýnisverðlaun Feitafélagsins

Friðrik Jóhannsson, skipstjóri, leiðsögumaður, ferðaþjónustubóndi og staðarhaldari að Sútarabúðum í Grunnavík fékk bjartsýnisverðlaun Feitafélagsins fyrir árið 2008. Fyrir vikið hlaut hann tvo fimmeyringa frá árinu 1946. Að því er fram kemur í tilkynningu frá Feitafélaginu hlýtur Friðrik verðlaunin fyrir óbilgjarna trú á Vestfjörðum, veiðum og ferðamennsku, á lífinu sjálfu og samferðafólkinu. „Ef fleiri væru eins og Friðrik væri íslenska þjóðin ekki í þessum vanda.“ Feitafélagið, sem er karlaklúbbur á Ísafirði, afhenti Friðriki verðlaunin í gær.

Feitafélagið hafði þetta um Friðrik að segja: Friðrik fæddist í Tangagötu 23 á Ísafirði einhvern tímann á síðustu öld, líklegast á fyrri hluta aldarinnar þó margt sé óljóst um það enda á óræðum aldri. Síðar varð fæðingarstaðurinn gerður að salerni í Tangagötunni og segja má því að minningin um Friðrik hjálpi heimilisgestum í baráttunni við harðlífi í fleiri en einum skilningi. Friðrik hefur um áratuga skeið sótt sjóinn – tekið þátt í lífsbaráttu Vestfirðinga og verið sínu svæði og þjóðinni allri til sóma.

Friðrik hefur á einkar skemmtilegan hátt sýnt að áræði og hugmyndaflug fleytir manni langt og er skipið Ramóna dæmi um slíkt. Fullyrða má að ekkert núlifandi skip tekur eins örum breytingum og Ramóna – sem þjónar ýmist sem fiskiskip, ferðaþjónustuskip eða rannsóknaskip – allt eftir vilja og skapi skipstjórans. Ef ekki væri fyrir hinn einkennandi lit skipsins myndi Friðrik líklegast aldrei muna útlit þess – svo mikið kamelljón er Ramónan.“