Sjávarþorpið Suðureyri kynnt í Vísindaportinu Í Vísindaporti vikunnar mun Benedikt Bjarnason segja frá verkefninu Sjávarþorpið Suðureyri. Sjávarþorpið Suðureyri er klasi sem hefur það markmið að efla atvinnulíf og bæta mannlíf á Suðureyri og í nágrannasveitarfélögum með markvissri uppbyggingu ferðaþjónustu á svæðinu, bæði með bættri grunngerð og aukinni þekkingarsköpun ásamt öflugu markaðsstarfi. Markmið fyrirtækisins er m.a. að fjölga störfum, efla atvinnulíf á svæðinu og vinna að bættu mannlífi með margvíslegum hætti. Samhliða þessu verður unnið að því að laða að ferðamenn og bjóða þeim að upplifa sjávarþorpið Suðureyri eins og það er með þátttöku í daglegu lífi íbúanna. Þeir fá þannig að fræðast um lifnaðarhætti og menningu íbúa í litlu sjávarþorpi á Íslandi. Einnig mun félagið kynna þær vörur og þjónustu sem í boði eru, bæði til innlendra og erlendra ferðamanna með sameiginlegu vörumerki svæðisins, hinum glaðbeitta Bobby.

Bætt í albúm: 27.1.2009