Bjartsýnisverðlaun F.C.Feitafélagsins 2012

   

                                   

                                                             -  fréttatilkynning

 

 

 

 

Bjartsýnisverðlaun F.C. Feitafélagsins á Ísafirði (FCFÍ) voru afhent í dag í sjöunda sinn. Það var formaður félagsins og æðstráðandi, Páll Hólm, sem afhenti viðurkenninguna ásamt hjálparsveinum. Handhafi Bjartsýnisverðlauna Feitafélagsins árið 2012 er Örn Smári Gíslason rafvélavirkjameistari.

Verðlaunagripurinn sem fylgir vegsemd þessari nefnist Í deiglunni og er hannaður og unninn af Páli Hólm, formanni F.C Feitafélagsins. Þar er um að ræða myndlistarverk unnið með blandaðri tækni sem sýnir stílfærðan áprentaðan bol í sterkum litum. Að auki prýðir verðlaunalistaverkið að venju ígildi 1 mills, tveir íslenskir fimmeyringar steyptir í brons á því herrans ári 1946. 

Örn Smári Gíslason er verðugur handhafi bjartsýnisverðlaunanna fyrir athafnasemi, frumkvæði og dugnað í uppbyggingu iðnfyrirtækja í Ísafjarðarbæ. Hann stofnaði ásamt félögum sínum rafverktakafyrirtækið Rafskaut árið 1997. Þar vinna nú 15 starfsmenn. Rafskaut er alhliða rafverktakafyrirtæki. Það hefur tekið að sér stór verk eins og raflagnir í Óshlíðargöngum og endurnýjun raflagna í Vestfjarðagöngum.

Á síðasta ári keypti Örn Smári og félagar til bæjarins Fánasmiðjuna ehf. og var hún sett upp í Norðurtangahúsinu og veitir nú 4 störf. Fánasmiðjan framleiðir silkiprentaða fyrirtækjafána af öllum gerðum, veifur og borða, buff og boli, en einnig fatamerkingar og útskorna límstafi á allt milli himins og jarðar. Í Norðurtanganum er jafnframt komin upp vatnsskurðarvél til alhliða notkunar í iðnaði, sem gefur óþrjótandi möguleika fyrir framleiðslu úr ýmsum efnum. Fleiri verkefni eru í undirbúningi á vegum eigenda Rafskauta og samstarfsaðila í uppbyggingu iðnaðartækni, sem koma munu í ljós á þessu ári.

Örn Smári Gíslason er fæddur og upp alinn á Patreksfirði. Hann stundaði nám í rafvélavirkjun við Iðnskólann í Reykjavík og meistaranám við Rafiðnaðarskólann og Menntaskólann á Ísafirði. Hann er búsettur í Hnífsdal.

Örn Smári hefur sýnt bæði djörfung og dug í sköpun nýrra atvinnutækifæra í Ísafjarðarbæ, í anda hugsjóna Feitafélagsins. Hann er því vel að þeim heiðri kominn að verða handhafi Bjartsýnisverðlauna ársins 2012.

---

Fyrirmynd bjartsýnisverðlauna Feitafélagsins eru hin þekktu dönsku "Bröste"-verðlaun, sem lögð voru niður fyrir nokkrum árum. Ákvað þá Feitafélagið að taka upp merkið, þar sem það var látið niður falla. Verðlaunaféð er upphæð sem samsvarar 1 mills, sem eftir ýtarlega rannsókn útleggst sem 10 aurar íslenskir, útgefnir árið 1946.

Þeir sem áður hafa hlotið Bjartsýnisverðlaun Feitafélagsins eru:
1. Aldrei fór ég suður - tónlistarhátíð
2. Ástarvikan í Bolungarvík
3. Sjávarþorpið Suðureyri
4. Kláfur upp á Gleiðhjalla
5. Ramóna - Friðrik J. Jóhannsson ferðaþjónn
6. Heitt á prjónunum - Gerður Eðvarsdóttir

---

Ísafirði 10. febrúar 2012

F.C. Feitafélagið

Páll Hólm formaður.